Gaur egun, konplexutasun handiko eta konponbide zaileko arazo sozial berriak ari dira agertzen, eta ezinbestekoa da horiek konpontzen lagunduko diguten pentsamolde berritzaileak garatzea. Gizarte berrikuntza funtsezko baliabide bat da, eta oso eginkizun garrantzitsua du, arazo horiei aurre egiteko modu berriak garatzeko.

Gizarte berrikuntza kontzeptu polisemiko eta dimentsio anitzekoa da. Hainbat ikuspegitatik eta modutan azter daiteke. Europako Batzordeak Gizarte Berrikuntzaren Gidan (2013) jasotako definizioaren arabera, gizarte berrikuntza ideia berriak (produktuak, zerbitzuak, ereduak, etab.) garatzean eta ezartzean datza, gizartearen behar bati lehendik dauden ideiekin baino eraginkortasun handiagoz erantzuteko, harreman sozial berriak sortzeko eta emaitza hobeak eskaintzeko.